Ago moun-yan !
Zòt tout anprann kou tout moun ki nou pédi roun potomitan di nou kiltir. Madanm DIOMAR a li ki té prézidant « Les sapotilles » , nou té lé viré bay kontré nou té fè ké li pou rann li roun omaj épi pou di li GRÉMÉSI pou tou sa i poté ba nou so konésans , so jantiyès , so lanmou pou so kiltir.
Roun lo bravo pou ou Madanm DIOMAR ou viré jwenn tout nou moun latradisyon ki alé , roulé tanbou pou nou laro , voyé lavwa pou nou laro , fè nika ké kanmaza palé laro !
GRÉMÉSI MADANM DIOMAR
Nou ké kontré ké Asosiasyon Les sapotilles
Nou ké koumansé pa prézanté asosiasyon.
So prézidant a Madanm Ghislaine DIOMAR , so non a “Les sapotilles” , I fèt an jwiyé 1975. Jou so kréasyon i té gen Huguette TIBODO, Paul RULLIER, Armide HODICQ, Benoît STEPHENSON, Etienne LEBA, Fabien ROUBEAUD, Sergine NEWTON, Gabrielle NEWTON, Edgard Newton, Maurice PERRET, Gisèle MATHEUS.
Jòdla jou Hugette TIBODO a so prézidant lònò.
Pou nou répétisyon nou kalé annan lékòl Moulen a van atè Rémir-Monjoli ! Tou lé mardi dipi 19h jis 20h30 pou granmoun-yan épi lé vandrédi dipi 17h jis 18h30 pou tou piti-ya.
- Ba nou objèktif « Les sapotilles »
Nou objèktif a di fè moun entérésé yé kò épi transmèt nou tradisyon kréyòl pou jenn-yan pou nou koutim pa pédi a roun démarch édikatif ! Nou gen ròt objèktif a di fè nou tradisyon viv dèrò ròt koté pli lwen ki Lagwiyann.
Pannan pliziyèr lannen nou té ka fè roun èspèktakl chak lannen asou « Tradisyon ké modèrnité » . Nou alé wè sa ka pésé dèrò annan fèstival BAYONNE , SAN SEBASTIEN , ISÈRE, CANADA , BRÉSIL ké BRETAGNE. Nou fè roun ekspozisyon kostim tradisyonèl Gwiyanè. Épi nou préparé jenn-yan pou yé BAC o5 yé té ka pran opsyon dans tradisyonèl.
- Ès zòt pé palé nou di mannyen zòt ka maché ?
Kou ròt group nou gen roun biro ké prézidant , vis prézidant , sékrétèr…. Atò nou gadé mannyen maché anvan ké roun rwa , roun renn ké roun prensens ké dé komisèr ka véyé asou displin ké règl group-a.
- Ké sa zafè kovid ki difikilté zòt trapé oben ki bagaj nòv kovid mennen pou zòt ?
Dipi sa zafè kovid nou pa ka répé anko5 ké sa zafè kouvre fe, pas nou ka répété annan roun lékòl.
- Ba nou roun dolo ka reprézanté « Les sapotilles »
« Dilo tonbé pa ka ranmasé »
- Ba nou roun dousèr ka reprézanté « Les sapotilles »
Nou ké ba zòt roun frwi sapotiy pas i agréb annan nou bouch ké so bèl koulèr !
Chanté Madamn Hugette TIBODO « Sapotille fruit très rare et recherché » . Chanté anblématik di nou group.
- Si to té sa roun ritm ki lès ou té ké enmen èt ?
Grajé ké grajé vals lò nou ka dansé nou viv li !
- Si to té sa roun dans ki lès ou té ké kontan èt ?
Roun katouri pas i ka protéjé nou di sole ké lapli